சென்னை: தமிழக வெற்றி கழகம் (தவெக) கட்சி கொடியில் யானை சின்னத்தை பயன்படுத்துவதைத் தடுக்க கோரி, சென்னை சிவில் நீதிமன்றத்தில் மனு தாக்கல் செய்யப்பட்டது. இந்த வழக்கில், கட்சி தலைவர் விஜய் ஏப்ரல் 29க்குள் பதிலளிக்க சென்னை உயர்நீதிமன்றம் உத்தரவிட்டுள்ளது.
இந்த வழக்கை, பகுஜன் சமாஜ் கட்சியின் மாநில பொதுச் செயலாளராக உள்ள பெரியார் அன்பன் என்ற இளங்கோவன் தாக்கல் செய்திருந்தார். அவரது மனுவில், யானை சின்னம் தேர்தல் ஆணையத்தால் பிஎஸ்பிக்கு ஒதுக்கப்பட்டுள்ளதாகவும், அதனை தவெக கட்சி தங்களது கொடியில் பயன்படுத்துவதாகவும் அவர் கூறியுள்ளார்.
இந்த வழக்கு, சென்னை சிவில் நீதிமன்ற நீதிபதி சக்திவேல் முன் விசாரணைக்கு எடுத்துக்கொள்ளப்பட்டது. விசாரணை நேரத்தில், பிஎஸ்பி சார்பில் ஆஜரான வழக்கறிஞர் பி. ஆனந்தன், பிஎஸ்பி என்பது தேசிய கட்சி என்றும், யானை சின்னம் அசாம் மாநிலத்தைத் தவிர்ந்த மாநிலங்களில் பிஎஸ்பிக்கு மட்டுமே ஒதுக்கப்பட்டிருப்பதாக தெரிவித்தார்.
இதே சின்னத்தை மற்றொரு கட்சி பயன்படுத்துவது, வாக்காளர்களிடையே குழப்பத்தை ஏற்படுத்தும் என்றும், பிஎஸ்பியின் அடையாளத்துக்கு பாதிப்பை ஏற்படுத்தும் என்றும் அவர் வாதிட்டார். இதையடுத்து நீதிமன்றம், தவெக தலைவர் விஜய் இந்த வழக்கில் ஏப்ரல் 29க்குள் தனது பதிலை தாக்கல் செய்ய வேண்டும் என்று உத்தரவிட்டது.
